Si pensamus enas lenguas comu un ambienti natural, ondi las palabras son las especiis deferentis que se muevin en ellas, caúna con una lavol i un delavón ena caena, hallamus que tamién buscan un equilibru.
Siempri que un puebru palra una lengua, precura una almonía dela que tien nacencia la gramática. Los sonis múan, s'enxertan o se desparecin arreglu alo que más interessi ala lengua i las palabras nunca acaban de moril, porque siempre puein volvel a envernecel quandu agarran un senificau nuevu o s'encastan o alterean el su pelagi pa adatal-si ala nueva condición.
Sin embargu, comu puei passal en qualquiel rinconinu natural, sin pensálu, puei entral una otra especii que no aconllega conas que estavan denantis i acaba por desiquilibrá-lu: la variedá de sonis i hormas s'envierti en un paisagi simpli i probi.
Una palabra folastera que s'entra en una lengua la tracamundea, lo mesmu que el black-bass contra enguilas, xaramugus, vezerus, bordallus o barbus. Assina ondi s'á dichu sanoti, téntigu, ralidosu, leal, decenti, derechu, hormal, puntual, aparenti agora con "es buena genti" ya está tó dichu i ondi antis avía enzinal, alcornocal, olival, robreu, alamea, alisal, fresnal o çauzera, comu no sabemus destinguil los árvulis (i dá-li gracias que entovía estén!), pos 'bosqui' i si ai avenencia, no sirvi d'acuerdu , pos un OK relumbrosu aspera cerca del gallitu pa salil sonriyendu-si pola boca.
Vivimus ena espurguiña del iperónimu, que joreandu, quea comu grancias la nuestra riqueza i guarda ena troji el granu estrangeru. Múa la corcha por prásticus i sedrá pogressu. Comi tomatis en eneru i havas en setiembri i sedrá comerciu.
Demasiás muacionis en el ambienti en tan pocu tiempu: sin dexal resolgal lo que avía, se mueri en el ahogaeru de no sabel relumbral i regenteal, porque nunca aprendierun alo autóctonu a dissalil i despuntal con bernís i porpulina.
Los pontonis dela lengua
En viendu los esgrafiaus dela ilesia del'Asperilla embaxu'l cielu brevi d'otoñu, assina, entre las çarças, los retejonis i vigas que malaspenas sustienin el tiempu que passa, caigu comu giganti quandu se trompieça.
Al otru lau dela calli, los pañus de piera se recuelgan delos árvolis i s'arropan dela fusca del monti, con el'alma dun vieju que busca entretenga en sentil los páxarus i dexal-si, a pocu a pocu, dormil. Pallí, dos ventanas s'abrin entre epocas destintas: una, cona toça de maera i un cravu retuertu i herrugientu, i la otra, cona segurança dela toça de piera, quiel bulral-si del tiempu. L'Asperilla s'encoruja comu un puebru buhíu i, vítima del su propiu aburrimientu, se hundi junta los cerezus sin remediu.
No dexu de dá-li vueltas i d'echal el reol entre el fuscarral i los canchus que huerun la cantera d'essi puebru, esperandu que me palri delos tiempus sufríus de patrás. Peru ni la tardi dizía ná.
La modestia d'essas parés tien el gañíu delos estremeñus: garraspuínu i apagau, comu los que se dan ena soledá dela hesa i namás lo escuchan sigrus dispués.
Con el coraçón engarañau ajorru el caminu abaxu en procura del cochi. Ya, deque veu la carretera, el tiempu vuelvi a correl, pareci la tardi barruntandu-si la vaca-sollá, asseñalandu que'l mundu seguía repiandu mentris que me perdía a mí propiu nel silenciu del'Asperilla.
No echu en cuenta las cosas delas que vos ei estau palrandu estus dos añus, son demasiás comu pa recordal-si de toas. Dos añus ena prensa estremeña dan pa muchu: ata pa palral de cómu la naturaleza devora los puebrus quandu el ombri no los abita.
Esperu que las colunas estas (más que colunas, pontonis) de ca semana sirvan paque no passi cona lengua comu cona Asperilla i cona leyenda i el usu de tós vusotrus le deis sostribu a essi mundu que es el nuestru palral estremeñu.
Este diario lo hacemos todos. Contribuye a su mantenimiento
ING Direct - Sierra de Gata Digital
Nº CC ES 80 1465 010099 1900183481