jueves. 28.03.2024

La Estremaúra sin (n)ombris

Una de las causas polas que se pierdi una lengua es la emigración. Es curiosu que en una tierra comu la nuestra tan grandi i tan rica en toa crassi de recursus estemus faltus del prencipal: el ombri. Tierras de vega, plaus eternus, dehesas que de bel nacíu aquí Vergiliu no se huera cansau d’escrivil; sierras rúspiras i campiñas comu maris permanecin aburrías en una sociedá que alampa pol funcionariau, pos d’otra manera es quasi que impossibli vivil aquí.

Los que vivierun aquí no siempri huerun ombris que ahuían dela tierra que los vidu nacel. Dendi los viejus lusitanus i vetonis que corrían entri las enzinas i los canchalis estremeñus, ata la allegá delos morus, la genti daquí, fiel ena su hincaera, supu mantenel-si delo que la tierra dava ena briega contina conas huerças dela naturaleza. Hue deque los cristianus del norti, cantábricus, leonesis i castellanus ajorrarun a estas tierras pa imponel la su alministración i la esplotación por mé dela dehesa (d’essus tiempus escurus bien la palabra) quandu la nuestra Estremaúra emprencipió a dal la boqueá. Sigún diva pulandu la Mesta, la nuestra tierra se convirtió en monea que se compra i se vendi i, pol caminu ya perdimus muchus machos que trunfaron en América sigún los nacionalismus chamicianus. Largu está essu de sel trunfu, quandu obrigaus pola necessiá tuvun que ahuyil daquí muchas cabeças de familia a tencias dela monarquía i delos sus servicius pa ella. Quandu volvierun pacá, angunus puestus ricus, se hizun ala manera dela nobreza local, los que dizían perulerus, mexicanus o indianus que comprarun cortijus i casas grandis enos sus puebrus de nacencia. A costa de qué, el tiempu lo inculta. No ai trunfu nengunu en aborral una coltura i los estremeñus, entallaus comu estavan, contribuyerun.

Peru no queava Estremaúra empeloti sina genti que ahuyó palas Indias, entavía quearun aquí otrus sufrioris que padecierun entre los sigrus XIX i XX la despropiación insensata de tierras comunis, la perda de uertus, senaras i ganau. Una sociedá, que en tó i por tó dependía del campu con mu poquinu comerciu i artesanía, se vei en pocu más dun sigru esmangajá, esvalijá i abarrancá. Añidimus enfermedais i una esperança de vida de 30 añus ata bien entrau el sigru XIX i la criación duna escuela que adotrina —no enseña— ata nuestrus días. La suma de toas essas circustancias estóricas es una sociedá engurría, engarañá, abexiná i auténticamenti acomprexá i endividual.

Corrientimenti se sustién que la ralidá periférica Estremeña con relación ala capital del Estau i tolos epissodius que esprimentó alo largu dela su estoria hazin dela nuestra tierra una colonia. Estu tien dos caras, la primel d’ellas que las riquezas dela nuestra tierra son produzías i vendías ahuera, siendu los estremeñus namás la pieça básica del engrani dela economía nacional por sel quien cría i cosecha, sin beneficiu, más que una míseri parti.  La segunda, enque económicamenti enfuncionemus comu colonia, umanamienti tamién lo hazemus comu cantera. Aquí está la conceción falsa de que Estremaúra mos pari i alogu «mos da la patá». En essa sitación de colonia ondi no mos perteneci a nusotrus ni los propius ganus delo que trebajamus, pos son otrus quien se relambin con ellus, talmenti dependientis delos engranis burocráticus que apeninas si poemus consideral-mus amus dela cuenca del gaspachu i con un sistema educativu que mos incuca dendi chiquininu lenguas i colturas folasteras paque mos acostumbremus a marchal, acabamus sintiendu-mus obrigaus a dil-mus pa querel siquiera vivil. No passa comu antiguamenti que vien otru puebru a quemal los campus i a acupal las casas, ni una catastrofi comu un temblol, un andanciu, una riá o una seca que mos ponin en tal gurrumina que devemus d’aballal. Agora derechamenti se mos obriga dendi ahuera por mé dela mala governança, l’alministración i la educación.

Quandu los griegus antiguus se divan delas sus poleis i ahilavan pa otrus puertus marítimus a colonizal era pola necessiá: falta de tierras, umentu dela pobración o una guerra. En Estremaúra tenemus la paradoxa de que siendu pocus pala tierra que ai, mos train guerras por razonis d’estrategia —la más clara la que sufrimus contra los nuestrus vezinus i mediu paisanus portuguesis en el sigru XVII—. Esta tierra lo mesmu sirvi de plau que de tableru d’axedrés que de laboratoriu esprimental, siempri títari en manus ajenas. La Guerra Civil hizu d’Estremaúra otra ves un tableru pusiendu ala contra unus con otrus, truxiendu muerti, más miseria i desazón. La conseqüencia, paru, hambri i emigración. De esta penúltima emigración —digu penúltima porque agora estamus viviendu la última—, la más asseñalá dela nuestra estoria cona movición dela metá dela pobración estremeña, bailandu entre el 30% i el 50% sigún las comarcas.

D’esta grandi perda de genti nueva enos puebrus truxu el enviejamientu i la impossibiliá en muchas familias d’acontinal cona tradición que ellus propius erearun. Sufrimus el acolturamientu por mé dela educación que mos reprendía i reprendi por dizil aguçalapi, aiga, chacho, el mi libru o velaquí, que mos enseñan juegus folasterus, costumbris como Halloween, cantaris enventaus i maneras de contal i alministral el mundu no polo que es, sino polo que val. Mos quea por un lau una familia que pierdi la trasmissión por causa dela emigración i otra familia que la pierdi pol acolturamientu que s’agarva detrás del nombri de alfabetización.

Dispués de queal Estremaúra desierta de genti, la sitación delos que se quearun eno tocanti ala coltura tradicional no es mejol. Comu si diendu en el pescanti dun carru andi llevamus tola estoria se huera colandu entre las hiendas i la çaga tolo que amus síu sin dal-mus cuenta, ahilamus palantri a costa de perdel lo nuestru de manera incoscienti. Las generacionis más nuevas, los que agora son quinzeñus i venteñus, ya vivin liquiamenti eno que án dau en llamal globalización tan cérrimamenti que son escapás de sabel-si mejol las autovías d’Estau Uníus que los andurrialis del puebru. El hechu de miral más pallá enantis de conocel lo propiu causa un vazíu enormi que ententan arrellenal cono dahuera, cona pingolla siempri enos andaris delas tenologías i las raízis no sabemus mu bien óndi.

Namás los estremeñus viejus, comu los romanus, sabin valoreal la tierra tantu comu pa regressal a ella quandu los añus pesan, peru las acordanças entovía más. Aquí, enque aigan muau muchu las cosas, entovía ai enzinas i olivus i xaras i los regatus i fragüinis cantan en el campu, i ai casas de piera, suelus i poyatas de piçarra. No amus perdíu el airi, enque esté tó tracamundeau. Á si angún día prencipiamus a concencial-mus de que Estremaúra es delos estremeñus, delos estamus daquí i delos que están dahuera, porque çugamus d’ella la bravés, la pacencia i l’alegría en angún tiempu dela nuestra vida i essu se lleva en el tútanu pa siempri.  Si mos queamus sinas palabras pa entendel la nuestra tierra, mos concalecemus i dexamus de sentí-la comu parti de nusotrus. Los ombris necesitamus essi sostribu, el suelu dondi nacemus, paque nunca perdamus la brúxula andiquiera que vaigamus.

-----

Afotu.-  “Gigüeñas”. Detalle de una acuarela de Aitor Cáceres Trueba

Este diario lo hacemos todos. Contribuye a su mantenimiento

ING Direct - Sierra de Gata Digital
Nº CC ES 80 1465 010099 1900183481

La Estremaúra sin (n)ombris