Quandu salimus al campu de escobas, xaras i retamas, lilas de cantuesus i lirius, de mapolas colorás, se estremescran enas narizis los goloris del romeru, del tomillu, dela presta o la magarça i polos lombus se retuercin las enzinas hiziendu figuras de sombra i airi enos nuestrus ojus, mos sobrecogemos pola variedá.
Si aballamus pa otru país, mos gozamus conos saboris de pratus que no conociamus, mos retratamus delantri de casas, puentis i palacius que paquí no son vistus i dimus comu taramas locas entre canchus o estatuas que paquí no ain. Mos susprendemus delas costumbris que los tiempus án díu tallandu ena genti i, cona golienda de conocé-las mos çamargullimus i mos imponemus en ellas, enque sea por oras o días, precurandu adatal-mus.
Essi caraiti social dela genti mos premiti compartil las esperencias dela vida i enllenal-mus de tó i de tós, reparandu-mus en que nel hondón encontramus los parecíus. Peru quandu essus parecíus dexan de susprendel-mus porque la coltura pierdi el sentíu de vía de comunicación i passa a entendel-si comu barrera de comunicación, mos pensamus que la igualdá es tiral del raseru paque las quartillas dela coltura pesin toas lo mesmu.
Aquí en Estremaúra, comu en otras muchas tierras del mundu, la coltura delos puebrus siempri luzeó entre la fatiga delos sus pobraoris. Son razinas de sol que divan destraçandu el caraiti delos estremeñus que, dendi los que medían el tiempu aburacandu pieras ata los que s’assentavan en castrus en cima de cotorras o los que se divan con el su ganau cañá alantri buscandu pastus mejoris, asseñalarun el su comportamientu.
Eran bravíus los antiguus, libris ena naturaleza d’enzinas i canchus, conociendu enos sus trebajus los maniantalis i riveras, saliendu de cabresteu a abrigual la calol del sol. Muchas colturas passarun por aquí a queal-mus la su huéliga: celtas, romanus, germanus, morus, judíus i cristianus. Ca qual cona su lengua, los sus diosis, la su coltura. Huerun gustosus d’estas tierras los puebrus más bravíus i los más aventajaus i sin dil-si del tó, siguin a vivil entri nusotrus. Antigüíssimas ténicas de piera seca, erencia de vetonis i lusitanus, acovijarun la vida de pastoris i guardas del campu por sigrus. Calçás que destraçarun con pacencia los romanus i que otrus suarun hendiendu el suelu, mos truxun pas i guerra.
Norias, canalis, molinus salpican las vegas, ingeniería dun puebru que conocía el coraçón del’agua porque ena su tierra los desiertus acistavan la vida.
Ai unus sigrus vinun del norti cavallerus cristianus a hazel-si cona ferti Estremaúra, muandu el quartu crecienti pola crus, i a governal destensas fincas i puebrus. En baxu de tós estus sinus, adagius i canogías, los estremeñus mos criemus aprendiendu de toa essa genti cona horma dela hesa, las montañas i los sagraus Guadiana i Taju.
Aprendimus a palral lenguas polías, rezias i libris, a hazel cosas que de largu no se destacan del entornu, a entendel la diniá del guarrapu, a hazel achiperris de corcha, a vivil lo mesmu en una barrera de piçarra que renti a las corrientis bravías de Guadiana, a confial entri nusotrus i nusotrus queandu la puerta delas casas abiertas pa quien lo precisara.
Con tó i con essu son osaus de llamal-mus puebru incultu i inoranti. Tanta á síu la machaquina dendi estus tiempus atrás que, desconfiandu-mus de nusotrus propius, amus teníu a bien i precisu hondeal con toa essa coltura encarcujá i enhastiosa i abraçal sin reparus la que pola educación i los canalis de comunicación atualis entró.
Assina los zagalis hazin escorroçus i s´escupulizan quandu oyin mental ná dela su tierra, estuviendu inorantis delo qué más cerca tienin, porque impuestus enas colturas i lenguas forasteras, vivin enas farullas del enganchi tenológicu, desenganchaus dela ralidá.
Los estremeñus estamus perdiendu el espíritu dela hesa, respirandu del airi descoloríu dela globalización andi ya no semus frutu dela estoria, del ambienti, dela naturaleza daquí, si no hilinus grisis duna redi tecía mu largu.
Assinque no entendemus ni los canchus aburacaus, ni las calçás, ni los molinus, ni las casas de piera, ni la lengua delos nuestrus avuelus, porque los queamus aburríus. Las çarças devoran las palabras conas que llamamus las toças, las ombreras, las taramas, las bollagas, los picapecis, las pegas, los honchis i los cascabullus. No conocemos el amigu quandu lo llamamos amigu, ni la calleja quandu la llamamos calleja, porque namás quea que la conseña dela piera en que l’amistá i la calleja se sostriban.
El estremeñu se deslei, s’insuelvi, i la moorra dela puelmi gris vai emboeciendu i agalvanandu el caraiti, sin pensal, a pocu a pocu, ata desparecel-si. Muchus puebrus del mundu están abaxandu-si, amenuyendu las deferencias, alisandu la coltura que dexa de sel charramandusca pa ser prana.
Ya el carné de identiá no son las nuestras palabras ni las nuestras acionis porque milenta de pessonas hazin lo que nusotrus i sin embargu no dexamus de sentil endretu que estamus desacolocaus.
Namás rezetamus una cosa: volvel a escuchal el ritmu dela hesa i sentil delos nuestrus avuelus las palabras conas que mientan la ralidá, por si poemus encontral otra ves el nuestru sitiu.
Este diario lo hacemos todos. Contribuye a su mantenimiento
ING Direct - Sierra de Gata Digital
Nº CC ES 80 1465 010099 1900183481