jueves. 28.03.2024

El reútu dela literatura en estremeñu

Dendi el Organu de Siguimientu i Cordinación del Estremeñu i la su Coltura bemus aviau una norma ortográfica que premita a tolos estremeñus escrevil la palra que sientin enrredeor. Vos quieru muestral a Luis Chamiçu canteandu un testu suyu al estremeñu usandu d´esta norma

Margarita. Acuarela de Aitro Cáceres Trueba
Margarita. Acuarela de Aitro Cáceres Trueba

Consejus del tíu Pericu

En esti enterés que me ocupa pol muestralvus el trebaju delos escrivioris estremeñus, sean mu anombraus o no, vos traigu de nuevu a Luis Chamiçu que recadó enos sus puemas la palra dela Baxa Estremaúra, cumu a él le sonava o cumu pensava que devía de trascrevilu. Estu es assín porque era pueta i no filólugu o lengüista peru prencipalmenti porque no essestía norma denguna ortográfica. 

Qué ubiesi passau d´essestil una norma ortográfica? Ara vedréis el puema “Consejus de Tiu Pericu” endispués d´adatau ala norma OSCEC. Enuna prósima, vos traigu un puema de Graviel i Galán.

No me himplis, no me himplis, mocosina;
no t’enfusquis ni me faltis al respetu,
no reguñas, Carnación, ni esparrataquis
essus ojus de que yo te dé un conseju. 

Essus ojus que otrus días me miraban
chiqueninus, entornaus, çalamerus
i ara miran rancorosus i assustaus
del sentil que llevas drentu
i de la onra dela tu casta que farrungan
essa jambri que tú tienis de dineru
i essi ergullu malditu, porque sabis
que eris uapa, más que tolas del puebru.

Ya te dixi que el noviaju s’á eschangau,
que no quieru yo haronis, que no quieru
ni las hesas, ni las yuntas, ni los milis
mal ganaus pol pairi de Nocenciu;
que el suol que las muestras frentis esparraman
pa ganal el cachu pan que mos comemus
hiedi a sangri corrompía si es que vuelvi
a musotrus del arcón del esureru.

No me himplis, no reguñas; no te casas
con el iju de tíu Brunu, no consientu
que esta cara tan bonita que án bruñíu
estus labius con la huerça los sus besus
ata hazé-la reluzienti comu l’oru
dela tardi, quandu el sol se va del cielu,
te s’empringui con el vau delos suoris
ya puiríus enfechaus en el cuerpu
sin que chupin las esponjas del trebaju
la carroña creminal del su venenu.

Semus probis, ija mía, porque izin
que son probis los que no tienin dineru;
semus probis, semus probis, qué sé yo!,
essu izin de musotrus, izin essu.

Quieru un ombri de riañus, que te quiera,
quieru un ombri con agallas, delos muestrus,
d’essus ombris que dispiertan las gallinas
quandu salin conos burrus del cabrestu,
i nel campu despabilan las alondras
agachás entre los surcus del barbechu,
que esparraman los sus chilríus d’amol
quandu vien el sol agateandu polas morras
i s’ahuyin las nieblinas i s’apagan
las estrellas i la luna i los luzerus.

Quieru un ombri sin fanfarrias que te diga
los sentiris que se hinchan mu padrentu,
ata quantis que revientan en paliquis
que los ojus arrebuscan en el suelu.

Quieru un ombri, quieru un ombri d’estus ombris
ya curtíus pol fríu del iviernu,
i tostaus pol sol dela meyodía,
i bañaus polas aguas de hebreru,
i besaus pola luna quandu duermin
enas eras, juntu al trillu, cara al cielu.

Que estus ombris son los machus duna raça
de castús labraoris estremeñus
que inorantis delas cencias delos sabius
las honduras d’otras cencias descubrierun
cavilandu tras las yuntas
ena pas delos barbechus.

Ellus sabin que la tierra labrantía,
seria, llana y arroganti enos recuestus,
es la hembra que mantieni muchus ijus
cola huerça dela savia los sus senus;
i es la mairi, i es la novia i es la ermana
del gañán que, cona calol de machu en celu,
la colmara de cudiaus,
la regara con suoris del su cuerpu,
la labrara con cariñu,
derramara polos sus surcos el graneru
i supiera conformalsi qual cristianu
quandu Dios, dendi los cielus,
pa preval si eran mu hondas las sus querencias,
malograra los sus eshuerçus.

Que estus ombris que al amol delos sus terruñus
ayuntarun el sentil delos sus adrentus,
despreciandu la pereza sin descansu
delos ijus poltronaus del dineru,
cola huerti calentura dela su groria
que manó del coraçón a los sus celebrus,
conquistarun palos reyis dela su patria
los Perusis i los Méxicus,
i enllenarun de pinturas las sus ilesias,
i palrarun el su sentil enos Congressus,
i cantarun la belleza delos sus campus,
i elevarun las sus plegarias alos cielus,
i murierun ergullosus pola causa
delas santas libertais del su puebru…

Son assina los cachorrus dela raça
de castús labraoris estremeñus,
que, inorantis delas cencias d’oi en día,
cavilandu tras las yuntas descubrierun
que los campus dela su patria
i la mairi los sus ijus son lo mesmu.

Puema adatau ala norma del Órganu de Siguimientu i Cordinación del Estremeñu i la su Coltura (OSCEC). Del blogs. Palramus estremeñu. Normandu el estremeñu. OSCEC 21/11/2914. Dendi OSCEC bemus entangau una norma ortográfica que premita a tolos estremeñus escrevil la palra que sientin enrredeor. La retrataura es d´una acuarela de Aitor Cáceres Trueba: “Margarita”.

Este diario lo hacemos todos. Contribuye a su mantenimiento

ING Direct - Sierra de Gata Digital
Nº CC ES 80 1465 010099 1900183481

El reútu dela literatura en estremeñu