viernes. 29.03.2024

Proyectu: idiomas en peligru de extición

Existin un-as 7000 lenguas nu mundu. Casi a mitai delas están en peligru de desaparecel en cen anus. Esti ritmu é muy alarmanti, aunque existin ferramentas y tecnología que pudrían cambial a tendencia. Se poi traballal n-a documentación, n-a preservación y n-a enseñanza

Muy interesanti a Web feita por Google denominá: “Idiomas en peligro de extinción, un proyecto de la Alianza para la diversidad lingüística”. 

Existin un-as 7000 lenguas nu mundu. Casi a mitai delas están en peligru de desaparecel en cen anus. Esti ritmu é muy alarmanti, aunque existin ferramentas y tecnología que pudrían cambial a tendencia. Se poi traballal n-a documentación, n-a preservación y n-a enseñanza.

In esti proyectu on line que se nus presenta, us usuarius ademais de accedel a información mais actualizá y completa d-as lenguas en peligru de extinción, podin puñel u idioma n-a red, enviandu información en archivus de textu, audiu, vidiu y ficel prácticas recomendás y casus prácticus pa compartil cuñucimentus uníndusi en grupus. Logicamenti cu-n u asesoramentu y supervisión de expertus en conservación da-s lenguas.

Dentru de esti proytectu actúa a “Alianza para la Diversidad Lingüística”, lanzá pur un-a serie de grupus de to u mundo, que ten por objetivu aceleral, reforzal y catalizal a actividai relacioná cu-n a documentación de lénguas en peligru de extinción, prestal apoyu as comunidais que lutan pur a protección y a revitalización da-s suas lenguas y que combatin a amenaza d-a sua desaparición.

Se poi solicital a participación n-esti programa de apollu as lénguas de forma personal o comu un-a organización.

Relacionau cu-n esta cuestión, nus preguntamus ( o non…), que pasa cu-a nosa Fala. Alguen se acorda del-a, está tamen en peligru de extinción?, aquí (Valverdi, As Ellas y Sa Martín) somus teóricamenti un-us casi cincu mil falantis y comu sempris, se ha conservau d-a su maneira natural y lógica que é transmitíndusi de padris a fillus, nu patiu da escuela cun us amigus, cun us viciñus, etc., pero, estamus segurus que esti patrimoniu tan importanti non está desaparecendu?. Non é posibli que fallamus algu pur esta lengua que si desaparecera, se levaría definitivamenti muta e importanti información cultural y científica compará cu-n a desaparición de un-a especie.

Da un poicu de lástima que cun as ferramentas que temus actualmenti, nun sepamus reforzal esta lengua nosa que tantus anus levamus falandu. Nun sé cual poi sel a solución, pero seguru que naidi (o sí…) vai a vil de fora a salvalnus. Seguramenti hay muta genti traballandu en temas de A Fala, que é de agradecel ya que algún día esis esforzus ajudarán, pero teñú a sensación de que ficemus poicu a nivel colectivu. Pareci que estis nun son bos tempus pa líricas, aunque otrus tempus tampoco han siu. Nus toca lutal pur u nosu y aunque opinu que u ideal sería tel un-a sola lengua en tó u mundo que unira as comunidais en lugal de separalas, esta Fala nosa supón un patrimoniu mui importanti que temus obligación de conserval, especialmente porque nus afianza n-a nosa forma de sel, n-as nosas construmbris y tradicións.

http://www.endangeredlanguages.com/

Proyectu: idiomas en peligru de extición