¿Comu surgiu a idea de creal esta nova asociación de falantis? A razón principal ha siu a inqueitu y u interés que varias pesoas venin mostrando pur a lengua de us tres lugaris desde fai varius anus. Nus estamus dandu conta du posible deterioru que us tempus actuais están provocandu en A Fala pur diversus motivus y hemus considerau u momentu adecuau pa empezal a traballal, na media das nosas posibilidais ena promoción y conservación desti importante patrimoniu.
¿Cualis son uns principais objetivus? Comu recolhiin us estatutus aprobaus u día 8 de juliu, se denominará ASOCIACION CULTURAL “ A NOSA FALA” y ten comu fin principal, a promoción da Fala nas suas tres variantis (mañegu, valverdeiru y lagarteiru) comu un-a expresión de cultura, comu un-a forma de aprendel a realidai y cuñucel a lengua que utilizamus, cun a que nus relacionamus y deselvolvemus, que ten hondas reicis históricas y que permanci viva actualmenti.
Tamen se recolhin comu fins da Asociación, a realización de accions dirigías a mantel, rescatal y recopilal as manifestacions de A Fala nus distintus ámbitus da cultura ca sustentan. Recopilal tradicions y mostras de lenguaji en distintus soportis audiovisuais, fomental a escritura y favorecel un-a proyección social medianti u desarrollu de accions que a prestigin promovendu u usu nus ámbitus dondi nus desenvolvemus us falantis, así comu a sua difusición fora da nosa comunidai pa que esti patrimonio sea compartiu.
¿Sustitulhi esta asociación a sua predecesora Fala i Cultura? Non. Consideramus que A Nosa Fala non trata de sustituil a ninhua otra, sempris se ha considerau fundamental e importantísima a labol realizá pur Fala i Cultura, pero consideramus que se trata de “otru momentu”, de otru grupu de pesoas que agora nus decidimus a actual cun otru formatu de trabalhu mais adecuau aus tempus actuais.
U profesol Costas propusu nesti diariu a organización dun homenaji en us tres lugaris a Domingu Frade. ¿Vai a tomal a nova asociación u testigu? Nesti momento y debiu a juventu da nosa asociación, nun se ha planteau esta cuestión. Si me gustaría añadil, que a sesión de constitución que se celebró un día 23 nas Elhas, foi invitau Domingu Frade, que felicitó aus asistentis y deseo u maiol exitu a esta nova asociación.
¿ Que proyectus ten preparaus a nova asociación? Un dus primeirus objetivus a realizal en septiembri, é a elaboración dun paqueti de actividais que serán presentaus as Administracions y que serán u puntu de iniciu du trabalhu a ficel por A Nosa Fala.
¿Qen formará us organus rectoris? A asociación será gestioná y representá pur un-a Junta Directiva formá pur dez miembrus, dus cuais, tres serán us representantis de As Elhas, tres de Valverdi y tres de Sa Martín de Trevelhu, así comu un representanti de otrus colectivus (expertus, académicus, etc..) Asi mismu entre esta Junta Directiva han siu elegius un Presidenti, Carlos Marquez Durán, un-a tesoreira, Aracelli Barroso Lanchares y un secretariu, Manuel V.Pascual Gómez.
¿Comu podin as pesoas interesás asocialsi? Se está elaborandu un modelu de solicitu, que en brevi estará disponibli pa que tos aquelis que queiran sel socius podan inscribilsi ena asociación.
¿ Cree que a fala está en peligru de extinción? Exactamenti en peligru de extinción poi que non, pero si está entrandu nun-a dinámica mui peligrosa de pérdida y castellanización que a largu plazu poi causal un danu irreparabli.
¿Cuántus falantis existin ena actualidai? Pues consideru que aldededol de cuatro mil falantis.
¿Van a trabalhal cun a universidai? Comu é lógicu, esta asociación vai a trabalhal cun tos us organismus que podan aportal algu y seguru que a Universidai estará entre elis.
¿Cree que u gobernu regional apolha activamenti A Fala? Pues sinceramenti creu que actualmenti non se presta apolhu por parti da administración regional, pur isu, entre otras coishas, se crea esta asociación, pa intental recabal u soporti que corresponda a un patrimonio tan importante que u é tamen de ámbito regional.
¿Considera a asociación, comu mutas vecis ha repitiu esti diariu, que A Fala poi sel un factor de desarrollu económicu pa a Comarca? Consideramus que é un factor muy importanti pa u desarrolhu economícu comarcal. A realización de estudius, a presencia de lingüistas y otras mutas actividais a ficel, incrementarán u patrimoniu i istu contribuirá sin duda a pontencial a comarca.
